سلام  

ونحن معكم نتحاور في كلمة              ســـــلام 

الأول ..       أخونا المطرب محمد عبد المطلب قال زمان .. من غير سلام يا سلام فتم وعديتم ..

الثاني ..      والست أم كلثوم قالت .. بالسلام احنا بدينا بالسلام .. يا سلام  ..

الثالث ..      وعم عمر الجيزاوي قال .. سلاموا عليكم .. عليكم السلام ..

الرابع ..      وفي الأفراح يقولوا .. سلام مربع  ..

الخامس ..   وكانت جدتي - الله يرحمها -  .. تقعد في السلاملك ..

السادس ..   ولما واحد صاحبي ماكانش يعجبه كلامي كان له تعبير يقول  ..  ياسلام ..

السابع ..     واحد تاني لما كان يخاف من حاجه .. يقول
ياسلام سلم  .. يعني الأول سلامات .. والثانية مبدأ أمان .. والثالثة .. حياتي .. والرابعة مزيكه .. والخامسة قعدة .. والسادسة إستغراب .. أما الأخيرة خوف ..

وما قلتلكش بقى عن سلام الشجعان ..

زي ما شفتم موضوع السلام أصبح محير جداً .. كل واحد يترجمه على راحته .. وأحياناً تدخل فيه حكومات .. وعالم مالوش آخر .. ولا أول .. وأنا صعبان عليه الحيرة دي كلها .. 

لكن لو سألتني .. نفسك في إيه قبل ما تموت ..؟ أقولك نفسي العالم كله يعيش في سلام وأمن .. وكل واحد يبقى آمن على بيته وأهله .. والسلام يعم العالم كله .. عشان الأجيال والأطفال تقدر تنعم بحياتها .. ونستمتع بالإختراعات الجديدة .. ونبعد عن القنابل النووية والرعب اللي عم العالم .. وينضف الكون وتنضف البيئة وتنضف الشعوب .. وتصبح شعوب حلوه جميلة ما تقولش
غير سلامات .. مش شعوب ذرات ..