إوعى تقول تعبان
 

مع ناس ما بتقدَّرش
 

وإوعى تبان عَّيـان
 

مع خلق ما بترحمش
 

إفضل حصان السبق
 

بتلم في جوايز
 

ما تقولش آه ياولد
 

ده لفظ غير جايز
 

تجري وتكسب كتير
 

ح يأكلوك سكر
 

والكارو مستنظرك
 

لو بس يوم تخسر
 

******

أصل الغلابه كده
 

يا أمة العاملين
 

أجير ما بين ده وده
 

يا خلق يا موظفين
 

نصيحه يا ابني يابن الناس يا ابن الجيل
 

شغل دماغك تلاقي خير ولا القناديل
 

قالوا زمان .. إن فاتك الميري إتمرغلي في ترابه
 

وأنا أقول يغور .. يندفن الميري في ترابه
 

شغلك لنفسك .. تدخَّـل خمسه أو خمسين
 

أفضل من المرمطه والشخط والأسافين
 

محتاج تطاطي توطي وتمسح جوخ
 

والكل يضرب ويلسع يزُّق يلهف خوخ
 

مطلوب تكون ساكت لا تعترض لا تثور
 

لا فكر مطلوب ولا مناقشه حمار أو طور
 

إصحى يا سلطان زمانك
 

قطر الحَلَى حيفوت
 

فجأه محلك مكانك
 

و ح تمشي بالنبوت
 

وعشان كده يا ابني
 

بانقلَّك الخبره
 

ما ابخلش بيها عليك
 

وأهي شئ من العبره
 

أرجوك يا ولدي اعتبر
 

بنصيحه مجاني
 

رح تبعدك م النواح
 

ما تقولش آه ياني
 

وبلاش حصان السبق وإسمعني من تاني
 

إمسك عصا يا جوكي إعزف نغم تاني
 

تحصد نتاج شغلتك
 

تنعشها بدماغك
 

وتكبرك فكرتك
 

سلطان في زمانك
 

******