قرا بالي بالك كلامي عمل مظاهره غضب
 

جمع زمايله ويهتف عيب .. دي قِلِّة أدب
 

إزاي تقول عنِّنا كل الخصال ديه ؟
 

واللا إحنا ناس مسخره وإنتو أفنديه
 

إحنا ملوك الطناش لكننا واضحين
 

ببجاحه بنقول ألوه .. ولشغلنا فاهمين
 

ونداري على شمعنا وشمعنا بيقيد
 

نصرف .. نبعزق .. ويومنا كله دايما عيد
 

ولا احنا بيهمنا جدعان ولاد أزمه
 

والندل فينا بعيد خالص مالوش لازمه
 

بأعلى صوتنا نطالب سحب الكلام كله
 

وإلا فيه محكمه والقاضي ح نقوله
 

يحكم بشنقك في ميدان نشتريه مخصوص
 

ونقطعك فتافيت ونعلقك بلبوص
 

وندعي دايما عليك عشان تتوه وتلوص
 

ما تلاقي كلمه تقولها علينا يا خلبوص