حدوته صغننه قوي  …

 " سـنيــــوره "

           سنيوره فلاحه بنت الأرض .. بنت القريه .. تحب الأرض .. تحب الناس .. تحب البلد .. تضحك للكل .. تشتغل في الغيط زي راجل تمام .. أبوها مبسوط بيها .. وأمها سعيده .. ما تخافش من حد .. تتكلم مع كل الناس بلون واحد وأسلوب واحد .. واضحه دايما .. عندما يشتد بها الحال تلجأ الى الله تناجيه دائما ..

          مشاكلها جواّها .. تخاف تحكيها للناس .. من صغرها بتشتغل وتجري وتكافح ما شافتش الدلع .. كبرت .. والكل عينه عليهـا .. وهيه رافضه الكل .. رافضه وبس .. والأب متحمل والأم ساكته .. ياترى البنت عايزه إيه ..؟ البنت دايما سرحانه في ملكوت تاني .. إبن العمــده بيطاردها في كل مكان .. عاوز يتجوزها .. البنت مش راضيه .. حاسه إن ده السلطه .. حاسه إن ده الجبروت ..

          حاسه إنها لو إتجوزته ح تبقى مرات إبن العمده .. والكل ح يخاف منها .. والكل ح يعمل لها حساب .. مش عشان هيه سنيوره .. عشان مرات إبن العمده .. وإبن العمده شاب كويس مش ناقصه حاجه .. إنما هيه مش راضيه بيه .. البلد كلها بتتكلم والكل محاصرينها بعنيهم .. وهيه ماشيه .. مش شايفه حد حواليها غير الشجر والعصافير والأرض بتناجيهم  ..

          هيـه مش كارها الجواز لأ .. ومش كارها إبن العمده .. إلا لأنه إبن العمده .. يعني لو كان حد تاني كانت وافقت عليه ..؟ برضه مش عارفه .. لسه متلخبطه .. ويظهر الغريب في فرح فجأه بتغني فيه .. ويغني هو كمان .. صاحب العريس يمكن .. العيون بتتلاقى بتتكلم .. لكن لأ .. ده غريب .. طب وماله .. وينتهى الفرح والبنت سرحانه .. ياترى ده مين ..؟ ومنين ..؟ وتعرف إسمه .. حمدان .. غريب ضيف من بلد تانيه .. جاي ضيف أسبوعين على العريس وأهله .. ويتلاقوا ويتقابلوا ويتحابوا ويتهامسوا ..

          وفي كل مـره حمدان بيهرب كل ما تيجي تعرف هوه مـين .. أصله إيه .. حمدان كله تواضع كله خجل كله خشى .. عند كلمه إنت مين .. يهرب .. يزيد الحب .. والبنت مشغـوله .. يا هل ترى هوه ده .. واللا ده كان طيف .. خيال .. يا بت إعقلي .. مفيش أحسن من حمدان .. البنت بتكلم نفسها يزيد الحب .. والوقت يجري وحمدان يقرر الجواز .. ح يجيب أبوه .. والبنت مستنيه وتسمع صوت في الدار ..   

          يطلع أبوها .. ترفض تثور .. الأب مش فاهم .. والناس قاعده مستنيه رأي سنيوره .. والأم تتطلع .. هيه ح تقولي إيه ..؟ الأب يقول البنت مكسوفه .. الغدا جاهز .. وبعد الغـدا يحلى الكلام .. وإنتم ضيوف عندنا يا مرحبا بيكم .. والأم تتكلم ..

          والبنت متردده .. ح تقول لأبوها إيه .. ما هو ده إبن عمده كمان .. وأخيرا تصارح أبوها باحساسها .. الأب يضحك ويبكي عشان البنت كبرت .. وفاهمه .. ويشرح لها السلطه مش إبن عمده ولا حتى عمده ..

          السلطه حلوه .. لو كانت السماحه موجوده .. السلطه حلوه .. ما دام العدل مضللها .. العمده قانون .. والقانون عادل .. يبقى العمده ده أكيد عادل .. والعدل ميزان .. البنت مالت دماغها .. والزغروطه جوه الدار .. واجوزتي يا سنيوره بعد الصبر والله ما طال وبرضه لإبن العمده …

توته توته خلصت الحدوته

حلــوه .. واللا ملتوته

أكيـد ملتوتـه .. يبـقى عليـك حدوتـه…

تــعالى ورايـــــا …        

الصفحة السابقة - الفهرس - الصفحة القادمة