في لحظه سوق العذاب جاب الذئاب تعوي
 

كل الديابه إتجمعت وصوتها كان يدوي
 

وإتلخبطت هلافيت على كتاكيت بتصوصو
 

وكلاب تهوهو وتجري قطه صغيره تنونو
 

والكل هايص ولايص عايش في دوامه
 

لا حب نافع ولا إخلاص ولا كرامه
 

كتر الكلام الرخيص والرغي والحواديت
 

وخناقه قامت وعالم تجمع الفتافيت
 

******

بصيت عليهم أقول يا حسره يادي الشوم
 

إيه الحكايه يا ناس وإيه يفيد اللوم
 

قالولي روّح وسيب الخلق للخالق
 

قادر يجيبها عاليها واطيها مش فارق
 

قلت الخلايق عبيد يا ناس لرب رحيم
 

الرحمه فين من قلوبكم مين ينصر المظاليم
 

قالو لي دي كلمه لا تجيب ولا تودي
 

فرجنا على مشيتك وحياة أبوك عدي
 

******

يعني خلاص المبادئ ما لهاش مكان بينا
 

وراح زمان المثل وغرقنا في الحنه
 

كتب العويل مظلمه الكل يسمعها
 

سجنوا الأصيل واترمى في الظلمه وسوادها
 

لا كلمه نافعه ولا حكمه ولا إبتسامات
 

غير النواح والصراخ ولسعة الآهات
 

والناس يا عيني غلابة تجري لجل القوت
 

والكل دايس وبيعدي ويجري يفوت
 

******

والحل يا محترم إيه العمل قولّي
 

لا حل ولا ربط أهي دنيا ترللي
 

المسألة ناس تخاف ولا تختشي منك
 

لا كبير ولا صغير ولا عيل عتل همك
 

وأقولك إيه يا حبيبي روح بعيد عني
 

خلص الكلام وانتهى راح النَفَس مني
 

المسألة مسألة صحوه لكل ضمير
 

يعرف يقيس الصغير يحفظ مقام الكبير
 

******