أهل الأيَّامى الحلاوه سألوني ألف سؤال
 

كلام كتير وتقيل عن الحرام والحلال
 

وكله داير في موضوع واحد مفيش غيره
 

إزاي تكون الرشاوى بشكل عال العال ؟
 

******

أرجوك بلاش الحوار عن الحلال والحرام
 

موضوع إلهي ملوش بين الخلايق كلام
 

موضوع يشوِّك مالنا فيه ولا عنه
 

خلّونا بس ف حكاوي بدون لغط وعلام
 

******

الرشوة صبحت قواعد مترستأه وأسامي
 

قول الدلاله وقولها سعي ليامي
 

وناس كتير تقول عنها حق رجال
 

واهي كلها كلمات تقلقني في منامي
 

******

خواجه أبدعها وقالها تحت ترابيزه
 

مش فارقه ملوخيه ولا فارقه خبيزه
 

أهو كله يتاكل بمعلقه أو بإيد
 

وهات وخُد مش محتاجه تعويذه
 

******

الكل ياخد حتى العطا مقامات
 

وللفقير مصمصه والعضم والفتاتات
 

أما الغني يلسع هبره ورا هبره
 

طلع لسانه لابوك السقا يا ابني مات
 

******

والست رشوه سليلة أهل الحسب والنسب
 

وكله يحسب ويجمع وكل شئ بالنسب
 

سيجاره وبريزه أو شلن تكفي
 

ساعتها يتقال عليك واحد قليل الأدب
 

******

أهالينا قالوا زمان أهبر ياخويا جمل
 

وأنا أقولكم صدقوني ده شئ ما هوش العمل
 

ومهما تبني ح تسقط فوق نفوخ أهلك
 

ولا ينفعك لا خروف ولا نعجه أم الحمل
 

******