|
|
Sponsors | ||||
|
عينــات من بياعين زمان …
بيــاع زمان راجل على قد حاله إنما صدقني بيجمل بضاعته كان صوته جميل وعربيته أجمل .. وكنا وإحنا صغيرين أو وإحنا برضه كبار أيام من الزمن الجميل .. كنا ننتظره لما نسمـع صوته .. نعاكسه ويعاكسنا ونشتري ويبيع وهو مبتسم .. لذلك رأيت أنقل بعض ما كان في الحواري والشوارع وإسمع كان بيقول إيه ..؟ …
بيـــاع الكبـيـبـه .. كان راجل شيك .. يلبس الجلباب وفوق منه بالطو شـيك .. والطربوش معووج على جنب وعلى يده فوطه نظيفه .. وخلفه يسير العامل بتاعه يحمل فاترينه مغلقه فيها الكبيبه وأوراق اللف والقفص اللي يحط عليه الفاترينه لما يبدأ البيـع .. وكان نضيف قوي ..
مـاذا يقـول ..؟ ياكبيبــه يا أم البرور بالجوز واللوز واللحمه الضاني يا كبيبه
أول ما يقرب لأول الشارع العمومي .. في آخره .. يكون جَـَبر وخلص .. على فكره كلمة جَـَبر دي فلاحي قوي .. يعني ربنا كرمه وباع اللي معاه …
العـسـليـه .. هي نوع من الحـلوى من العسل الأسود .. تشيلها ست طيبه وصوتها جميــل .. وتغنى لها وتقـول ..؟ العسليـه العسليــه يــا حلاوه العسليـه
الشـحــات .. كان برضه يبيع بضاعه .. إزاي .. ماشي .. أعمى أو بيستعمى في إيده عصايته .. وحوله بنت وولد صغار .. هما دول الكورس .. وصوته جميـل .. وهذا هو الأوبريت الشحاتي …
الشحات .. يفرجها عليك ياللي تفطر العيال دي من خير الله .. الكورس .. ياعالم بالحــال يارب .. الشحات .. رغيف واللا حتة غموس من خير الله .. الكورس .. يا عالم بالحال يارب .. وبيكرر الجمل والنداءات ومقامات الصوت حسب حجم الحواري التي يدخلها ووفق رد الفعل من المرزوقات بأشكالها المختلفه ..
بيـــاع العرقسوس .. ياعرقسوس يا مسَكَّر يا مسَكِّر يا مسَكِّير .. شفا وخمير يا عرقسوس …
بيـــاع البطيـخ .. على المكسر يا بطيخ .. حمــار وحلاوه ..
لا مؤاخذه حَمَار مش حُمَار .. حَمَار بالفلاحي يعني أحمر .. بطيخه حمراء .. حلوه دي ..
الجـزار .. يمشى ومعاه الدبايح والصبيان وراه .. وغناء جماعي …
الجـزار .. من ده بكره … الصبيان .. بقرشــين .. وهكذا يتكرر الحوار حتى وصوله السلخانه …
بــص .. واحد كان يقف في شارع فؤاد (26 يوليو حالياً) أمام محل كبير قوي وعلى كرسي ومكشر ويشير بأصبعه للمحل ويقول بص .. بص .. بص .. بص ..
المراكبي .. المراكبي في النيل .. ومنزل قلع المركب … والرجاله ع الشاطئ مربوطه بالحبال وماشيه تغني .. يللا هيــلا .. هيلا يللا .. يطوي القـْلع الى أن تمر المركب من تحت الكوبري .. وبعد كـده نعـاود السير .. مش قلتلكم أيام من الزمن الجميل ..
|
|
||||
|
|
||||
