صابر على الصبر والصبر مش صابر
 

مع إنه علقم وأنا على المرار صابر
 

والناس بصبري نادوني قالوا يابو صابر
 

وبناتي صابرين وصبرية والبكر كان صابر
 

والضرب نازل عليه ساكت ما أنا صابر
 

ما تقولش راجل هفيه عشان كده صابر
 

والكل بيكش فيه أسكت أقول صابر
 

وأقول لكل الخلايق أنا لجلكم صابر
 

ما بدهاش يا جدع بلا صبر يا صابر
 

طيح في الخلايق واضرب لا تكون صابر
 

كون مفتري وافتري ع الظلم يا صابر
 

دشدش محل العطارة بالصبر يا صابر
 

اخطف واجري علام أمريكي يا صابر
 

طراطير وعوجت لسانها وكون لها صابر
 

صدقني روح إلغي إسمك بلا صبر يا صابر
 

آه يا صابر ……

 

موال عجب يا رجب بإسم شهر كريم
 

أهلك وسموك كده لعل تبقى كريم
 

وخرجت للكون ملاك وابن إبن كريم
 

وكبرت يا إبني وطلعت السنان تكريم
 

وفجأة صبحت نياب تنهش بلا تكريم
 

مع إنك إبن الأصول من صلب جد كريم
 

لقوك ولاد الديابة نسيت صفات الكريم
 

وجريت وفي ركبهم حلقات من التكريم
 

وضعت يا إبني ولا ذكرى ولا تكريم
 

آدي نهاية رجب من إسم شهر كريم
 

بلاش نسمي رجب يللا نسمي كريم
 

يا كريم إنت الكريم ……

شيكا بيكا هب إختشي وإتسلى ياويكا
 

تعالى واسمع كلام خرابيش وبلوتيكا
 

ألعب عليك الاونطه وأغني ع السيكا
 

نهاوند أرقص حجاز دربكه شيكا بيكا
 

تعالى العب معايا هلِّب وح أديكا
 

حتة حلاوه نقاوه شكلاته من إيكا
 

عشان تاخدني في دوكا أكلفتك وأجرى
 

ما هي دنيا فونيا ديِّـتها نفخه وتسليكا
 

دبور زَنّْ على خراب عشه راح وشه
 

م الغش أصبح سواد وقفاه مطرح وشه
 

يتمشى آخر مسخره ما يتكسف على وشه
 

ما يستاهلش إلا اللجام وتقوله حاه وتقول شه
 

لو يوم يقمص في الطريق أمسك عصايا حشه
 

الزن دايما صنعته أو حرفته مخلوق غريب
 

يا ريت غراب يخطفه أو بومه تاكل وشه
 

ياريت تدوم الموَدَّه وكل الناس تعيش أحباب
 

والجار يصبَّح على جاره في سابع باب
 

والناس تخاف ع المشاعر ويكتر الأصحاب
 

والإيد تسلم وتعمل للمحبه حساب
 

ويبقى زيتنا في دِقيقنا ويكتروا الخطاب
 

والفرح يجمع قلوبنا تصبح حياتنا شباب
 

ولو زعلت أجرى أصالحك بالورد يا صاحبي
 

دي دنيا فانيه ما تسوى الضرب بالقبقاب
 

والله با حلم يا عالم بعصر كله حنان
 

بعيون جميله وتتلاقى بحب زمان
 

واللقمه تتقسم وعالمنا يبات شبعان
 

وبالرضا والدفى طبعاً مفيش حرمان
 

وطول ما إيدك في إيدي الزمان منصان
 

لاخوف ولا رعب ولا خونه يلاقوا مكان
 

حصن الزمان في الحنان صدقني يا ولدي
 

نصيحه تنفع لدنيا كلها أحزان
 

بسلامته عامل زكي وهوه م الملاطيش
 

تقيل في دمه وخيبه ومصيبه ما تقوليش
 

والدنيا تقلب قصاده يا باي ومخ مفيش
 

تقوله أخبارك إيه يقول ليه يارب تعيش
 

تقوله تفهم سياسه يقولك خدمت الجيش
 

تقوله تاكل بغاشه يجري على القراقيش
 

أصله زكي والزكاوه مغرقاه لعنيه
 

إوعى تصاحب غبي أحسن تعيش شيش بيش
 

حبيبي فتوك فتاكه وعامللي فريفيكو
 

يفهمها لو هيه طايره لو ليها شيكو بيكو
 

ويقولك أنا واد كده أطلب وح أديكو
 

مخلصاتي وآجي ولحد عنديكو
 

أطلب تلاقي التلاقي أنا منكم فيكو
 

أسمع كلامه العسل خلص يا فريكيكو
 

يجري يفلسع صاروخ تقولش فريره
 

ويهبر الـمَّـم كله ولا لقمه يديكو
 

من صغري شقيان وباجري في دنيا ملجوفه
 

وألِّــم في قروش وأزرع والشكر ما أشوفه
 

أدفع ثمن الإبتسام ونتيجه معروفه
 

دايما يقولوا هات وبنغمه معزوفه
 

وما دمت أقول نعمين الحب بالزوفه
 

ويمسحولك جوخ وينضَّفوا الصوفه
 

لو قلت لأ يا ولد ح يطفشوا يسيبوك
 

ويضربوك ع القفا ويسرقوا اللوفه
 

الحب جاب لي مصيبه كتبت عنه كتير
 

طلعلي سمعه يا حسره إني فتك وخطير
 

مقطع السمكه وديلها وع الهوانم زير
 

ليلي نهاري وآخر عربده سكير
 

مع ان احساسي مرهف وللحلاوه أسير
 

دايما خيالي وسارح في القمر والطير
 

وف الهيام والحنان والعفه والتصوير
 

وكلمة الحب عندي دايما على لساني
 

ما احب غيره ولا حيره ولا تزوير