صــــــواريخ موجهــــــه …

          إنها ليست صواريخ أرض أرض أو أرض جو أو جو أرض أو جو جو من التي إستخدمت في ضرب العراق .. بل إنها صواريخ من الرجل الطيب الى الناس إللي هما ..

          وليس بالضروره أن تكون هذه عن تجربه ذاتيه ولكنها بالقطع نتاج السمع ونتاج ما يحدث حولنا جميعاً في هذا العالم الجميل جمال .. يا جماله ..

          وسـوف نرمز لها بالرمز  ص. م. … أهو .. رمز حركي .. عشان ما حدش يعرفها .. لزوم التخفي ..

المهم إنك تقرأ وبعد ما تقرأ تسكت وتفكر .. وترجع تقرا تاني …

تعـــالى ورايا زي زمان يمكن تكسب .. مين عارف .. يوضع سره في أضعف خلقه ..                         

ص. م. / 1   …!!!

___________

          كل شويه تقوللي سر سر سر .. ومفيش حاجه سر والناس كلها عرفتها .. وأنا آخر واحد تبلغه .. مع إني لئيم ولأني فاهمك .. أريَّحك .. وأرضي غرورك واسيبك تحكي لي وكأنـك أول مـره تحكي السر …

مع إني عارف السر من زمان .. منين ..؟ منك ..!!! إزاي ..؟؟

الحكايه إن الواد الطيب متربي كويس .. ومتمرمط كويس .. عشـان كـده ما يحبش يحرج حد .. وماله لما يكون غبي .. عشان الناس تنبسط إذا كان ده ح يرضيهم ..

وعشان كده أنا فاهم كل حاجه ومش ح أقولك عشان أنا مريح جداً .. وأصلي لو قلتلك يمكن تكون فيها أذيه لحد وأنا ما أحبش الأذى ..

والـــلا إيــه .. مش برضه هكذا …

ص. م. / 2   …!!!

___________

          إللي يشوفك بالدقن ( السكسوكه ) والسبحه وعمرات مستمره وحج كل سنه وحديثك الجميل .. وقال الله .. وقال الرسول .. الناس تتغش فيك .. لدرجة إن كلهم ظلموني عشـانك وإتحملت ظلمهم .. ولكن يا صاحبي كل شئ له آخر .. وياما قلت للناس ما تصدقوش .. الحكايه كلها عدة نصب ما حدش صدقني ..

وآدي الفاس وقعت في الراس .. وكلهم جولي واحد ورا واحد .. يقولولي شفت إللي حصل .. صاحبك عمل فينا وسوى .. قلتلهم ده مش صاحبي .. دا إنتم إللي عملتوا فيه كده .. صدقتوه وما  صدقتوش الواد الطيب .. وكل زُمبه وإنتم طيبين .. ويا هؤلاء .. ياريت تتعظوا ..

آدي ذنب هذا خلص من هؤلاء …

أليـــس كذالــوكا …

ص. م. / 3   …!!!

____________

          ما اشوفاكش إللا بتشكي وتبكي ودموعك ما شاء الله حنفيه من غير جلده .. معرفش ليه .. مع إني كلامك كله يناقض بعضه .. طب ليه كده .. يا راجل الشكوى لغـير الله مذلــه .. لكن أعمل إيه ..!! إنت غاوي .. الغريب إنك عملت مدرسة العياط الدوليه .. بقى لك تلامذه كتير قوي .. الواحد إحتار .. يصدق .. واللا مايصدقش ..

          الواحـد خايف لا يكون البكاء فعلي .. أضطر أنكسف .. لكن صدقني .. ح أشيل برقع الحياء .. وأقولك لا مؤاخذه .. فرجني على مشيتك .. حاول توفر الدموع .. واخلع النـظاره الســوداء .. لأنه ضاع العمر يا ولدي .. وبيت النتاش عمره ما يعلاش .. وما دام ربنا كارمك وعايش كويس بتاكل الشهد .. إمسح الدموع .. والـلا هيه الحكايه بقت الشهد والدموع …

ص. م. / 4   …!!!

___________

          يا لهوي عليك يا لهوي .. ح تتجنني بحركـاتك البلـدي .. لما تكون عاوزني تبقى نـاعم زي الغُريِّبه .. ولما تخلص مشكلتك تبقى تقرص زي التعبان .. مع إنك مش تِعــبان بس .. وتَعبان قوي ..

          لكن ح أقولك إيه ..!! حركاتك مكشوفه .. ولكنك يا ولدي محظوظ بتدخل حركاتك ع الناس الهبله إللى تحب إللي يضحك عليها وينصب عليها .. هما كده .. عشان كده إنت واد محظوظ .. والواد الطيب بيدعيلك ويقولك خليك كده محظوظ ..

يا واد يا محظوظ    حاء      ظاء     أوظ   …

ص. م. / 5   …!!!

___________

          باحبك واساعدك وإنت ما تساعدنيش .. مع إنك صاحبي .. وحبيبي .. وأخاف عليك وعلى قد ما أقدر أساعدك .. لكن إنت أصلك طيب زيي .. وعاوز تعيش .. عشان كده .. تمشي أمورك .. أهو وماله لما تاخذ مني أنا موافق .. بس خاف عليّه وإعمل حسابي معاك ..

          الواد الطيب ما يحبش ياكل لوحده .. يحب ياكل ويأكل الناس .. يحب يقسِّم الرغيف .. وكله ح يشبع .. لكن أعمل إيه في الناس اللي مش بتشبع ..

          الواد الطيب ما زال بيقولكم .. الطمع يقل ما جمع ..  الله يرحمك يا امه ….

ص. م. / 6  …!!!

___________

          كـلامي كلام في الهوا  .. ومع ذلك أنفخه .. أعمل إيه ..؟ يقعـد قدامي تلميذ .. آه يا ابن اللئيمه .. أتاريه بيتعلم .. مش بيتعلم وبس .. ده كمان بيروح يبيع كلامي ويبيع علامي .. يا حسره .. يا ريتنا ما كنا علِّمنا …

          الواد الطيب ندمان .. يا واد يا طيب .. لا تندم على خير بتعمله وإطمئن .. كل شئ وله آخر .. وح اتعلم إيه ..؟ وإنت عارف ..

          مهما تعلم في المتبلم يصبح ناسي …             

ص. م. / 7  …!!!

___________

          الواد الطيب ما لوش حظ في أصحابه .. إنت أخويا وحبيبي وصديقي وعمرنا ما اختلفنا .. بس أحسن بلاش نعمل شغـل مع بعض ..

لأني جبت لك أفكار كتيره وتقول هايل .. جميل .. حلو .. ولما تهدني جري وشغل تقوللي طيب قدم لي تقرير .. تقرير إيه ونيلة إيه ..؟

إشمعنى معايا بتعمل كده .. صدقني خلينا أصحاب بدل ما نخسر بعض .. وأنا اللي بقول عليك جدع .. وإنت لا جدع ولا حاجه ..

لكن أحسن خليك بعيد وأنا أحترم اللي خلفوك .. وإبعـد عـن الشر وغنيله ..       

ص. م. / 8 …!!!

___________

          ما تزعلش مني لما أقولك قررت أعيش لنفسي .. مع إنهم قالوا ما إستحق أن يولد من عاش لنفسه فقط ..

ولكن إحنا في الزمن الأغبر لازم نعيش لنفسنا .. لأن النــاس يا حسره ولا هيه هنا .. لا عاد يهمها إنت ولا غــيرك … ولا تلزمهمش ..

عشـان كده همه كمان ما يلزمونيش .. يبقى لازم أعيش .. أمال أفضل أحافظ عليهم وهمه في الباي باي ..

سلامات يا نفسي .. رح أقفل الباب عليه … هوه ده آخر كـلام الـواد الطـيب .. والباب إللي يجيلك منه الريح سده وإستريح …

ص. م. / 9 …!!!

___________

          تديله تديله تديله تديله ما يشبعش  ..ويقول يا حسره إنت بتعمل حاجه زياده .. إيه اللي بتعمله غير الناس .. إنت ح تذلنا عشان الحكايه دي ..

          وصاحبنا يفضل يقطم فيك ويديك كلام .. والواد الطيب من طـيابته بيتهـيأ له الكلام ده صحيح .. لكن .. بعد شويه يفوق الطيب يقول دول عالم ما تستاهلش الخير ..

دول ناس تاكل ما تختشيش .. ما هو ده اللي قالوا عنه … ياكل ويـتَّـكه ويقول ده ريحته مستكه …

ص. م. / 10  …!!!

____________

          ما تزعلنيش منك .. لأني عارف لو زعلت ح اشرب من البحر .. ومية البحر مالحه .. وح ترفع الضغط ..

خـللي بالك إنك ح تعوزني .. ولما ح تعوزني ح تلاقيني  .. لكن يا بطل لو دلقتني مش ح تلاقيني .. قابلني حلو .. وكلمني حلو .. وإتفاهم معايا حلو .. لأنك تعرف عشـان أكون حلو .. لازم إنت برضه تكون حلو .. ويبقى أنا حلو وإنت حلو وكلنا حلوين ..

          ولاقيني ولا تغديني .. أنا اللي ح أغديك وأعشيك وأفطرك كمان …

ص. م. / 11  …!!!

____________

          شكلك كده مش عاجبني لكن أعمل إيه ..؟ مضطر أتعايش معاك وأتماشى معاك .. طيب أعمل إيه ..؟

ما هو مش لازم أحبك عشان أشتغل معاك .. ومش لازم تحبني .. تعرف ليه ..؟ باحس في عينك بالغدر والغش والخديعه .. وإبتسامتك الصفراء قاعده تتلون على كل لون يا باتسته .. طبعا ما انتاش عارف إيه 31 تسته دي ..؟ إسأل أي حد يقولك عليها ..

لكن الأمر لله .. ولو إن معدتي ما تتحملش الليمون ولكن مضطر أعصره … عشان أتحملك وأتحمل حركاتك البلدي ..

  واصبر ع الجار السو يا يرحل .. يا تجيله مصيبه تاخده ..                        

جاتـــك ستــين مصـيبه …                         

ص. م. / 12 …!!!

____________

          إوعى تفكر إنك أصبحت قوي  .. لدغة نموسه يا إبني ح تعمل منك شخشيخه .. إوعى تفكر إنك قوى .. وتبقى مفتري بقوتك .. كله ح ينتهي ..

          إوعى تفكر إنك قوي بفلوسك دي .. فلوسك دي زبالـه ولا تسوى .. إوعى تفكر إنك قوي بحركاتك البهلوانيه .. كتير غيرك وقع من ع الحبل ..

          إوعى تفكـر إنك قوي بأصحابك أو اللمه اللي حواليك … دي تنفض من حواليك في خمس دقايق لو  حسوا بضعفك ..

          الواد الطيب فاهم ده كويس .. وبيقول سبب اللي يكبر يكبر .. ودع الخلق للخالق .. وكل شئ له آخر .. وكل شئ وله نهايه …

ص. م. / 13   …!!!

_____________

          بصراحه أنا مستخسر أكتب عنك حاجه .. لأن خساره الكتابه فيك .. حتى انت نحس ..

ورقم الصاروخ اللي ح أوجهه إليك رقم نحس زيك .. عشــان كده الواد الطيب يبعد عنك .. لأنه هو كمان نحس أكثر منك ..

والمنحوس منحوس ولو علقوا على بابه فانوس  …                                          

ونهايـه يعــني END ...

الصفحة السابقة - الفهرس - الصفحة القادمة