ولادة غنـــوه شبــــابيه …

كان ليه نصيب أحضر ولادة غنوه شبابيه ..

الملحن ما شـاء الله عليه .. قاعد خلف الأورج .. دن دن دن دن ..

وسعــد درابكه معاه الحُـق .. إللى هي الطبله .. وطق طق طق ..

وإسماعيل شخاشيخ بيوطي بالرق .. لأ لأ لأ .. ودخــل أخونا المؤلف .. وهبه جاهزين .. ده هو بيقول ..

-        إنت فين ياراجل .. ده الملحن بيقول ..

-     أنا موجود .. فين المطرب عبد السلام حامد جعفر الشرابي ..

ويدخـل المطرب عبد السلام حامد جعفر الشرابي .. بملابسه الشرابيه ..

وإسمحولي أوصف لكم ملابس المطرب الفنان عبد السلام حامد جعفر الشرابي ..

-     بنطلـون جينـز مقطوع من الركبه عشـان التهويــه ..

-        الجزمه .. إسكت ما اسكتش المزركشه ..

-        القميص مفتوح من فوق وعريان من الوسط ..

-     الجاكت أبو زراير عسكريه ولميعه والياقه عاليه .. وطبعا لا ننسى البرنيطه المقلوبه ..

هو هو هو .. إديــله ..

أيوه يا حلوين .. أنا بأدحرج التماسي .. ومسا التماسي مسا التماسي ياورد قاعد ع الكراسي ..

هوبا ليصـا .. قول يا مؤلف  ..

المؤلف يرد بسرعه .. بأقول إيه .. إنت جبت المذهب والمطلع وأنا جــاي في العربيه مش لاقيه .. عملت حاجه تانيه ..

هوبا ليصـه     هوبا ليصـا        الحياه كلـها تأفيصه

-     يـاه .. ياه .. ياخرابي .. ح تكسر الدنيا .. ده الموسيقار بيقول ..   

-     إديـني كده .. يادربكا .. خـش جـامد .. الطق .. الطق .. الطق ..

-     وإنت بقى معاه ياشخاشيخ .. ورِّق .. ورِّق .. لك .. لك .. لك ..

أنا بقى ح أقول أهو .. الملحن بيقول ..

وأنا باكتب معاك ع اللحن .. المؤلف بيقول ..                

وأنا دربكا معايا شخاشيخ .. هبا هبا هبا ..                                  

قول ياحبيبي .. قول .. ده الملحن ..                                                                         

إسمع مني .. وقول على طول .. ده المؤلف ..            

هبا ليصا .. هبا ليصا .. الحياه كلها تأفيصه ..         

الدنيا نار ..                     

وأخدنا التار ..

ولعبنا .. ولعبنا .. ولعبنا .. ولعبنا .. ولعبنا .. هبا ليصا .. هبا ليصا .. هبا .. هبا .. هبا ..

إلحق إتصل بشركة صوت الكروان ..

ح توزع إتنين مليون شريط ..

ح نعمل جوايـز .. إللي يشتري شريط ياخد معاه قزازه حاجه ساقعه ..

ما تقولشي حاجه ساقعه .. قول حاجه بارده .. ما تقولشي حاجه بارده .. قول حاجه متلجه .. والدنيا متلجه وساقعه قوي وساقعه جداً ..

وصرخ المؤلف .. إيه ده .. دي ح تكون الغنوه الثانيه في الألبون ..

         وسلام مربع ع الشباب …

الصفحة السابقة - الفهرس - الصفحة القادمة