خــايف أقــول اللــي ف قلــبي …

          ويا أيها الناس الحلـوه .. الناس الكويسه الصبوره .. إللى ربنا أعطاكم الصبر عشان تقروا كلام واحد زيي بيتهته ..

        أنا خايف أقول اللي ف قلبي بجد .. مش بمعنى الخوف .. ولكن خايف ما حدش يفهم إيه المقصود .. أنا كل همي في كل ما قلته ومافات وما هو آت .. إني أقول كلمه بين السطور أحيانا .. عسـاها توصل ..    

        أنا لست داعيه ولست واعظ .. ولكني منادي أحيانا يصرخ زي أخوانا اللي بيتقابلوا كل يوم حد في الهايد بارك في لندن ..

        ما هو اللي ما يعرفش الموضوع أقوله بإختصار .. فيه جنينه جميله في وسط لندن إسمها الهايدبارك .. الناس تتجمع كل يوم أحد من الصباح وكل واحد واقف على صندوق خشب أو كرسي أو ترابيزه صغيره وأحيانا صناديق مشروبات غازيه فاضيه ..

        وهات يا مناقشه ويعلن رأيه بمنتهى الصراحه والوضوح في هذا الجو الجميل .. وهب يطلع واحد أو إتنـين أو عشره يعترضوا ويبدأ الحوار الجميل والخـناقه .. تحت سمع وبصر العساكر الإنجليز .. ما حدش يضرب حد ولا يعتدي على حد .. مش زي عندنا في مصر تبدأ الخناقه ونـنـزل ضرب في بعض ..

واللا نعمــل زي إخوانا لما يتخانقوا في الشارع ينـزل ده من سيارته وده من سـيارته ويبـدأ الصياح ويتهيألك إن ح تحصل معركه من المعارك المصريه .. وفجأه إنت غلطان .. لا إنت غلطان .. وكل واحد يعود الى سيارته .. وآدي هايدبارك عربي ..       

ومن أجـل ذلك يا هذا وياذاك أنا م الأول قلتلكم ده كلام .. وكلام تاني .. كلام تاني واللا كلام تالت المهم إحنا بنقول واللي على الله على الله .. وح ناكل من بيتنا ..

فهمت حاجه .. يعني أنا بقى ما فهمتش .. معلش . يللا .. تعالى ورايا يمكن تكسب ..

الصفحة السابقة - الفهرس - الصفحة القادمة