خمـــسة جـــــــــد ..

هــل أنت أعطيت الفضل لمن يستحق الفضل ؟

أم أنك أعطيت الفضل لمن لا يستحق الفضل ؟

          الـواد الطيب فجأه لقى نفسه قاعد يفكر .. آل يعــني فيلسوف عصره .. المسأله مش مسألة فلسفه يـاباشا .. حلوه ياباشا دي ..؟ ما هو لازم نتمشى مع لغة العصر .. إيه الحكايه ..؟

          نرجع مرجوعنا للواد الطيب .. لقى نفسه قاعد يفكر بعد أن ضاع العمر وولى وفاضل من الحياه حبه .. قال طيب يا طيب إيه النتيجه والنتاج ..

          أيـوه .. نرجع لأول الكلام .. هل إنت أعطيت الفضل لمن يستحق الفضل ..؟ أو لمن لا يستحقه ..؟

          والله إذا كنت أعطيته لمن يستحقه .. فهو شئ جميل ورصيد حلو لحياتك .. وما دام الناس تستحق الفضل أكيد ح تكون أصيله .. وع الأصل دور ..

أمـا يا حبيبي يانور عيني إذا كان لا يستحق الفضل ..

          هنا تبقى مصيبه .. يبقى إنت كده ياواد يا طيب معملتـش حـاجه .. لأنك كان لازم تتأكد قبل ما تعمل .. آه .. ما تقوليش معرفش .. ما هو ربنا يا طيب يا محترم قالك تقصى وأنت بتزكي ع الناس ..

          يعني ما ترحش تعطي واحد زكاه وهو حرامي .. أو نصاب .. أو حشاش .. أو مدمن من شباب الأيام دي .. الله يسامحهم عذبوا أهاليهم .. قال والذنب ع الأهالي ..    

          آه والله .. الذنب على الأهالي .. يا ناس عيب .. الأهالي .. الأهالي .. الأهالي

          ما إحنا برضه كان عندنا أهالي .. وأهالينا علمونا فين الصح .. وفين الغلط .. وسابونا وإحنا عندنا عشر سنين نتحرك على راحتنا .. ولينا أصحاب .. وبنسهر برضه .. كنا بنسهر معاهم أحيانا حتى الصباح ..

          بس إحنا كنا عارفين بنعمل إيه .. إذا كنا بنسهر في فرح .. أو مذاكره .. أو حفله .. بس ما كناش بنبلبع .. أو نبرشم .. أو نشم ..

          كنا بنبلبع لقمه حلوه .. ونبرشم أسبرينه عند الصداع فقط .. ونشم هوا جميل وورده حلوه ..

          ونسهر للصباح في مناقشة كتاب جميل .. أو حفله نعملها إحنا .. أو نجامل صديق فرحته أو فرحة إخواته .. وكنا نرجع لأهالينا زي الفل .. مش زي جيل الزمن ده زي الزفت .. وتقولي الأهالي ..

          والمفروض زي ما قالوا زمان ع الأصل دور .. المفروض إن الأولاد والبنات .. مادام عندهم أصل .. وولاد ناس .. يحترموا ما قدم لهم من مزايا ..

الصفحة السابقة - الفهرس - الصفحة القادمة