الفضل ( واحــد ) ..

تكرمـه في صمت وتعطيه بسخاء .. ويعض الإيد إللي إتمدت لـه .. وأحبـه مهما أشوف منه ومهما الناس قالــو عنـه .. آه .. آه .. آه .. معقوله .. لابد من وقفه مع النفس .. ومادام شفت منه .. بلاش أحبه ..

صديقي الخايب ..

لا تنظر تحت أقدامك  لأنك لن ترى سوى الحذاء .. ده لـو كان عندك حذاء .. أما إذا كنت حافي فستظل حــافي ..

لا تتعجل المكسب السريع .. ولكن تأنى .. ومن تأنى نال ما تمنى .. وأقولك إيه .. أهو إنت خسرت الجلد والسقط .. خليها تنفعك .. أنا قصدي نفسك ..

هـأهـأهـأهـأ

الفضل ( إتنين ) ..

أُعَلِّمـه الرمايـة كل يوم ولما إشتد ساعده رمــاني ..

صديقي الفيل ..

لـو دامت الدنيا لغيرك كانت دامتلك .. معلش سـامحني لما أقول عنـك يا فيل .. بقى أعلمـك وأربيـك وأسمنك تقوم تقعد عليـه .. خللي تقلك ينفعك .. أصلك مش ح تقدر تقعد عليه وتبططني .. حتى لو قدرت وح تقـدر تبططني .. ح تعمل إيـه في اللي علمتهولك .. ح تنكره .. طب لو أنكرته .. مهو موجود في كيان الناس ووجدانهم .. الكل ح يهـاجمك .. وإذا فيه نـاس ضميرهم ينام .. دول قلة .. يا قلة .. الضمير الصاحي صاحي عمره ما يغفل .. شفت إزاي إنت فيل .. وح تفضل فيل .. ولانك فيل وتقـيل .. حركتك بطيئه جداً .. وح الف العالم وأرجـع لـك .. وانت لسه في أول الطريق .. رغم عمرك الطويـل .. ولا حول ولا قوة إلا بالله .. يا فيل ..!!!

الفضل ( تلاته ) ..

الى أخي العبيط ..

          مـش برضه تخللي عند البعيد شوية دم .. وتتكسف من نفسك .. زمان قـالولنـا الكبـار .. من علمـني حرفا صرت له عبداً .. وزمان أيام زمان كـنا لـما نلاقي المدرس على الرصيف اليمـين نجري نمشي ع الرصيف الشمال .. مش خوف والله ..‍‍ لكن إحـترام .. ليه .. ؟ لأنه علِّمنا وكـان أستاذنا لما يعلمنا حاجه .. نشيـلها جميـل .. ونحطها في عينيـنا .. ما نقدرش نقعد وهـو واقف .. ما نقدرش ندخل مكتبـه ونقعـد إلا لما يقوللنا أقعدوا .. مبادئ وأخلاق وتربيه .. لكن إنهـارده ياحسره تعـلِّم وتفهِّم ويركب عليك ويهز رجليه على كتـافك .. ويتمنظر باللي علمتـهولـه .. يا ناس .. إحنا غلط ..؟؟ يمكــن ..‍‍

الفضل ( أربعــه ) ..

          أيهـا الإبـن العزيز .. مش لازم تكون إبني .. يا أي إبن  لأي أب .. لازم تعرف إن أبوك ما يحبش حد أحسـن منه إلا إنت ..       

          ومـش لازم تبقى صـوره طبق الأصل منه .. إنما .. لازم تساعده أن يحقق طموحاته فيك .. لا تدور في فلك أنانيه الذات .. إستمع لصوت العقل .. كما تسمع لصوت زملاء وأصدقاء السوء في جيل السوء وعـالم السـوء .. ودنيا السوء في زمن السوء ..

          بص حواليك ولا تبص تحت رجليك .. بص قدامك .. ولا تلتفت خلفك .. بص و شوف وإتعلم وإستفيد .. لا تأخذك دوامة الحياه السهله الرخيصه .. فإن هـذا الرخيص غالي العاقبه .. والعاقبه عندكم في المسرات والأحـزان وما أكثرها ..          

الفضل ( خمسه ) ..

          حبيـبة بابا .. نصيحه يا بنتي .. يا أي بنت .. خـللي بالك من أعاصـير الزمن .. بيقولوا في الأمثال .. يــا مآمنا للرجال .. يا مآمـنا للميه في الغربـال .. مـش معنى كده إن كل الرجال دحاليب .. !! لكن من خـاف سلم .. وإنتي يا بنتي سيدة الموقف .. إذا كـان قرار إرتباطك كـان سريـع ومش متـوازن أو متكافئ .. ما يهمش .. لأن الحياه لازم تسـير .. وكل شئ قسمـه ونصـيب .. وما دام رضيت بالنصـيب .. هـوه كـده .. النصيب غـلاب ..

          ربـنا ادانـا عقل نفكر بيه .. وحذر من صاحبك ولا تخونوش .. بصي حواليك .. بـلاش في لحظة حنان أو حب صادق من إتجاه واحد .. تنسي .. ولما تنسي .. تفقدي الذاكره .. ولو فقدنـا الذاكره .. نفقد كل شئ .. أيوه نمشي .. بس مفتحين .. أيوه نضحي .. وإحنا واعيين ..

          أيوه نقف .. وإحنا مش نايمين .. كل شئ بالحساب حلو .. ولازم يكون فيه حقي وحقك في زمن ضـاع وضـاعت فيه الحقوق .. ومش باقي لينا إلا مدرسة الحقوق وتخرّج ناس ينصروا الظـالم على المظلوم ..

يا للي كان يشجيــك أنيــني
يا للي كان يرويك حنيـني
فين حنيني راح وليه
والأنين مستني إيه
ليه بتحرمني من البسمة الجميلة
ليه بتمنعـني من القعدة في خميلة
كل ده بإيدي وعنيه
تحسدوه إزاي عليه
دي السعادة بتيجي مره	هيه مره
والعذاب جه  ألف مره	وأي مره
منقولـة مـن كـلام الأسـاتذة

الفضل ( سته ) ..

          يا صاحب الفضل عرفنا إنك صاحب فضل .. طيب لما نختـلف لابـد أن تحافظ على علاقتنا .. إغضب كمـا تشـاء .. وإلعن كما تشـاء .. وإعمل ما بدالك ..

          لكن بحرص شديد .. بمعنى إيه .. لما تكون زعلان من أخويـا .. إزعل منه لوحده .. وبلاش تزعل من أهـله وإللي خلفوه .. ولما تزعل من أهله .. إزعل برفـق .. وتوقـع إنك ستعود مره أخرى إليـهم .. ح تقـول لهـم إيه بعـد اللي عملته فيهم .. لابد أن تترك الـباب مفتوح .. لابد أن تترك ثغره تستطيع أن تنفـذ منها ..

          يا خساره .. تحرق الأوراق .. وتحرق العالم المحيط بيك وبعـد كده تعتذر .. لا يجوز أن تستمع لهذه الحته الكومـيدي .. أعك وأعتذر ..

          وإوعى تتصور إن النفـوس بعد العك ح تكون صافيـه .. هيه ح تهدأ نعـم .. ولكن مش صفاء .. هيـه بتهـدى لأنه مرغم أخى لا بطل .. وللضروره أحكام ..   

 الفضل ( سبعه ) ..

          عزيزي الفضل .. ليه تفرش لي الأرض رمـله وتعـلق المنـاديل خضره وحمره .. وتقوللي تحت أمـرك .. ما يهمكش .. ولا تحمل هم .. وعيب ياراجل .. واللي تشوفه شوفه .. مفيش بينا فرق .. إختشي د انت أخويـا .. الفلـوس رايحـه وجـايه ..  لكـن معرفة الرجال ما تتوزنش بالفلوس .. وانـام في العسل .. واتكلم بلسانك .. وإطمئن .. والدنيا بخير ..

          وفجأة .. أتزنق .. وتسحب كلامك .. وانكسف أقـولك سحبته ليه ..؟ لأنك كبير وعلى حد علمي الكبير كبير .. وتصغر ف عيني ..

          لكن أنا أفضل كبير .. وأقول حاضر .. مش عن إقتـناع .. ولكن إستسلام وعلام .. ياه .. يادنيا .. كـل يـوم با أتعلم فيكي ..

          ومهما كبرت ح أفضل أتعلم .. بس بالراحة عليه لو سمحتِ يا دنيا .. قولي للناس مش كده ..

وعجــــبي …

الفضل ( تمانيه ) ..

يا ناكــر الخــير ..

          طب ليه كده .. دنا كنت باخد وأديلك .. دنا موصلاتي ..

          أجيب الخير على بيتك .. وأحرمه على بيتي .. أنا كنت أقطع من قوتي وأولادي وأديلك .. مش لاني مستغني ..

          لكن لأني والحمد لله صحتي كويسه وأقدر أجيب القرش بأي شكل .. وكنت ألملم ملاليم وأديها لك جنيهات ..

          وأجمع ميـات تأخذها ألوفات .. مع أن أبوك السقا مات .. لا انت قد الخير .. ولا تستاهله .. لكن كان عندي عشم يطمر فيك .. لقيتك .. ياحسره .. فيك إللي فيك .. وبتشـتم كمان في أسيادك .. طب ليه ..؟

          أدعيلك ربنا يهديك .. واللا ادعي عليك ربنا لا يهديك .. أصل حاولت أعرفك طريقه .. وإنت بولدوزر .. دايس وتبلط في حق الناس ولا بتحتاس .. ‍وتحتاس ليه ..؟؟ إذا كنت أصلا نصير البلطجيه وبتقلب الباطل .. بذمتك نسيت الحق ليه ..؟‍‍؟ أقولك الحق على عبد الحق ..

الفضل ( تسعه ) ..

يا فـاعل الخير ..   أنا في هذا العالم أصاب بالفزع عندما أرى الخـير من أصحابه .. صحيح الرسول عليه الصلاة والسـلام قال ما معناه إن الخير فيه وفي أمتي الى يـوم الدين ..

          ولكنـنا في هذا الزمان .. اللازمان .. يرعبـنا فعل الخير .. لذلك لا تتعجب من فضلك عندما تراني لا أتخيل إنك تعمل لي الخير .. بدون هدف ..

          فإنني مشكور وممتن .. ولا أجد كلمات الشكر اللي توفي قدرك لما تقدمـه لي من معروف .. وعندما أرى إخلاصـك أتعجب لأني في عـالم إتعـدمت فيه الألفاظ المسماه بالوفاء .. والإخلاص .. والإنتماء .. والصدق .. وعفة اللسان ..

          لذلك أرجو أن تقدرني .. والله العظيم أنا سعيد ومبسوط .. وقلبي بيرقص م الفرح لأن لقينا الناس إللي تعمل اللي ينطلب منها بأمانه وإخلاص ولا ينتظر الجزاء من الناس ..

          ولكنه يعمل لقاء وجه الله .. وصدقني يا عزيزي أن الله لا يضيع أجر من أحسن عملاً ..

إعمـل معروف يا ابو المصروف

يللي كلامـك حلو ومألوف                   

الفضل ( عشره ) ..

يــــــادينامـو ..     إنـت كويس .. وحريقة شغل .. وبتحبـني .. بس ليه مش طالعلي ..؟

        يمكن أنا غلط .. فيه حاجه غلط .. طب قوللي .. وخاف عليّه .. أنا برضه باحبك .. بس باخـاف منـك أحياناً صدقني ..

        ما هو أصل من خاف سلم .. أمال إيه .. إنت مخلـص معايـا .. بس أحيانا ألاقيك كده شويه مش مظبط .. حلوه مظبط دي ..

        تعبـير بلدي قوي .. ما هو عشان تفهمني .. أنـا عـاوزك تبقى عـارف إني فاهم .. بس أطنـش بمزاجي ..

        أنا أحيانا ملك الطناش .. وصاحب أغنية .. ياطنــاشي ياطنــاشي .. أقولك إيه إنت ع العموم حلو .. أحلى من غيرك كتير .. عيوبك سهلة البلع والهضم ..

        لكن التانيين أجـارك الله .. يعملوا عُسر هضم .. أقـولك إيه .. راجع كلامي تانـي .. لعل وعسى ..     

الفضل ( الحادي عشره ) ..

يـــا ناس .. لما أنا كملت العشره للفضل الطيبه .. قلت أكلم الناس كلها .. أصحـاب الفضل واقولهم اننا لن ننسى الفضل .. وناكر الجميل ما يستحق الحياه .. والحيـاه حلوه  ..

        ولازم نحب بعض ونخاف على بعض .. ما أعرفش كلامي ده فلسفه .. وح يجيب نتيجه .. نتيجة إيه ..؟

        معلش .. سامحونا .. باحاول أكتب كلام يمكن يكون له معنى ..

        عشـان كده أكرر وأقول ومش ح أبطل قول .. لما حد يعمل فيك معروف ما تنساهوش .. مهـما عمل فيك .. سيبه .. فيه إللي أقوى منـه .. وتسامح .. معـلش .. ح تقول إستسلام يا سيدي .. زي بعضه .. الإستسـلام أحسن .. حتى لو قالوا عنك ضعيف .. ضعيف ضعيف يا عم ماشي .. ما قوي إلا صـاحب القــوه .. واللهم قوّي إيمانك ..

الصفحة السابقة - الفهرس - الصفحة القادمة