الفضائيات

الفضائيات .. هذا الإختراع العجيب .. والأعجب فيه التليفون المحمول .. ويسموه في بعض البلدان الجوال .. الهاتف الخليوي .. وغيره من الأسماء العربية وطبعاً ع المستوى الأجنبي يسمونه الموبايل أو السللر .. ودوَّروا معايا وارسلوا لي الأسماء من كل بلد ونعمل إحصائية .. 

المهم .. مش هوه ده موضوعنا ياراجل يا طيب .. موضوعنا عن هذا الإختراع العجيب المسمى فضائيات .. العلم في خدمة
المجتمع .. ورفع المستوى الثقافي والفكري والصحي
والإجتماعي .. و … إلخ ..  ولكن إتفرج ياسلام .. وإسمع الكلام .. الناس من يوم ما اخترعت الفضائيات .. خلت زي ما بيقولوا العالم قرية صغيرة .. ولكن للأسف إن الإنسان لظلوم .. ياخد الحاجة الحلوه ويقلبها بقدرة قادر إلى نقمة .. إزاي ..؟

أقولك إزاي ..

فضائيات يعني غزو الفضاء .. لكن بعد هذا العمر مع الفضائيات .. خلوها ولاد الأبالسة فضائيات يعني فاضية .. يعني عالم فاضيـه .. مابقاش وراها إلا الدش .. والدش يعني طبق والطبق للأكل .. ولكن الأبالسة خلوها الدش بالفلاحي .. يعني الفلاح يقولك ح تجعد تدش .. يعني ح تقعد تتكلم بس .. أو الفلاح يقولك دشيلنا يا بت فحل بصل .. يعني كسري أو قطعي بصلة ..

طيب .. المفروض إن هذا الإختراع الملعون إللي بيربط الناس بالكراسي وتدوس على زراير وتشوف العالم .. لازم يكون ده
بفايدة .. يا حسرة ..

إنما لما سعادتك تجيلك فرصة وتقرا البرامج .. ح تلاقي معظمها..  هما هما .. طب ليه ..؟ تحت كلمة المناقشة تلاقيهم جايبين برامج سخيفه .. وحوار أسخف ويا حسرة .. وكأن العالم ما عادش فيه إلا الرقاصين والفنانين ..

وعشان ما تقولوش باضحك عليكم تعالوا نشوف على مدار الساعة .. يوم فضائي .. ح تلاقيه كله حوار حوار حوار مع إختلاف المسميات .. وفوازير فوازير فوازير .. فيلم قديم فيلم قديم
فيلم قديم .. والضيوف على أشكال .. إللي لابس ستارة سرير .. واللي لابس كيس مخده .. واللي لابس كيس مرتبه .. ده غير اللي لابسين شراشف ومناشف .. وتلاقي حبايبنا المذيعين والمذيعات كلهم سابقين الضيف .. والضيف ما سك في كلمة الواقع .. والواقع نحن الغلابة .. وكل شويه .. إبقوا معنا .. حتى الأكلات كان فيه شوية طباخين واخدين الموضوع جد .. دلوقتي إتفرج ياسلام .. مطبخ
الفن .. يا عسل .. ياحلاوة .. واللي .. وأو .. وآه .. وعيب
نكمل .. طبعاً أنا لن أقرب من الخط الأحمر إللي كلنا عارفينه ..
ح نشوف بلاوي .. يا حسرة .. وخدين التقليد الأعمى .. المطرب يروح الهند .. أيا كان هو .. ولا الحبشة .. أو الباكستان .. آه .. وكلام كتير مش عاوزين نكرره علشان ما يحفظوش للعالم
إللي ح تقـرا … وبعدين ياراجل يا طيب ..   ا نشوف .. طيب يا ناس مش كفاية التلوث البيئي ..!! م تيجو ننضف التلوث السمعي .. ما تيجو نتعب شويه .. ونفكر شويه .. بلاش نبقى زي القرود .. بلاش التقليد الأعمى .. تعالو نقعد مع بعض وننسق .. ونضبط .. الواحد لامؤاخذه إتعلم من العالم إللى حواليك .. عارفين ليه إحنا بنشوف جميع الأعمال التي تقدم ع الفضائيات العربية زيها في جميع الفضائيات الأجنبية بس على شياكه .. وحيث أن فاقد الشئ لا يعطيه .. عمرنا ما ح تكون لنا شخصية مميزة ..

أقول .. ياعالم الفضائيات .. عاوزين نقتل الفراغ .. ولكن مش بفراغ .. وبلاش نقول فضائيات من فاضي .. والناس تنفض من حولنا وتروح لفضاء القهاوي الأرضية .. بلاش نقول وأنا مالي وهو مالي .. وأقولكم إيه معلش سامحوني .. قد نختلف ولكن نأتلف
وتعالوا .. وخانقوني وناكفوني وفاوضوني في الفضائيات .. ومتفهمهاش على إني فوضوي .. وسمعني رأيك ..