العولمة

العولمة وهي من الكلمات المستخدمة في عالمنا المعاصر .. ولكي نفهمها ونتمعن فيها .. لابد أن نعرف أن هذه الكلمة إستخدمها الغرب ونقلوها إلينا .. العولمة .. وفي لغتنا العربية الدارجة نجد أن هذه الكلمة مقسمة إلى العو .. وهذا العو هو الذي تخوف به الأم إبنها عندما يبكي .. تقوله ح أجيب العو يكلك .. أما .. لمه .. ممكن تكون تقريب لكلمة .. لما .. أو لمه يعني زحمة ناس
بيتفرجوا على ناس .. أو لمـه الغير مهذبة والدارجة بمعني
المنطقة دي لمه يعني مليانه كل من هب ودب .. وإيه كل من هب ودب دي ..؟ يعني على كل لون ياباطستا .. وإيه يعني يا
باطستا دي ..؟ يعني أجارك الله .. ماتوقعنيش بقى .. إيه الحكاية ..!! خليني أرجع إلى موضوع العولمة ..

 ولو نتكلم جد شويه .. ح تلاقي العولمة .. مشتقة من كلمة العالمية .. يعني زي ما قلنا العالم ح يبقى قرية صغيرة ولازم كل واحد يقرب من بعضه .. طب إزاي ..؟ إشتراكية يعني ..!! يقولوا لأ .. سداح مداح .. يقولوا لأ .. أمال ح تقولوا إيه ياخوانا ..؟ يقولك العولمة دي معناها إن كله ح يقرب من بعضه .. بمعنى إن المعايير تتناسب .. معايير إيه ..؟ كل حاجه .. هوه كده .. بس الكلام ده يمشى مع الدول الغنية .. لكن الدول النامية واللا النايمه معندهاش قدره للكلام ده .. يقولك ما نعرفش هيه كده .. يعني نفهم من كده إنه لازم كل واحد يكون على معرفة ودراية بما يدور حوله من
العوالم .. قصدي العالم ..

 سؤال عارض لو سمحت .. قولي ياسيدي .. طب هيه العوالم جايه من العولمة ..؟ والله إذا كانت نوايا سيئة وقصدك عوالم الأفراح أو أهوه .. ما هو كله بيرقص .. وحزمني يا ..

لكن برضه لازم نعرف إن احنا لازم نعولم .. ولكن نعولم عربي مـش أفرنجي .. لحد إمتى اخوانا بتوع الأفرنجي ح يقعدوا يعولموا
فينا ..؟!!! انتبهوا يا عرب من طوفان الغرب .. الحقوا وخللوا بالكو من العالم التي تدعى العولمة .. وتعالوا نترجم العولمة بالعربي ونعمل عولمـه عربية مشتركة .. خللوا بالكو أحسن ح تروحوا في الباي باي .. ع العموم أنا قلت كلام خفيف ظريف لطيف بلدي وربنا يحعل كلامي خفيف عليكم .. وقد أعذر من أنذر .. عاوزين عولمه عربية وليست عوربيه ..

 وياريت نلاغي بعض ونكلم بعض وناخد وندي مش ناخد وبس .. أصل يا حبيبي الدنيا أخد وعطاء .. وسمعوني كلامكم واكتبوا وقربوا .. وقولوا إيه رأيكم .. إن كلامي كلام فارغ .. إنتم إملوه .. وأن كان كلامي متين .. رفعوه .. خسسوه .. وإذا كان كلامي عجبكم عولموه .. وعلى رأي اخوانا موه موه موه ..