ال جات

آل جات الحزينـة تفرح ..      ملقتلهاش مطرح  ..

جات إمبارح واللا النهارده .. جات ستين مصيبه ولد ما تتسماش .. كل دي مشتقات من كلمة الجات .. أما الجات إللي ح نتكلم عليه معاكم هو الجات بتاع الدول الأوروبية والغربية اللي ح تفرضه ع العالم .. وأهمهم العالم النامي الذي منه الدول العربية .. إيه بقى حكاية الجات دي ..؟؟!! إديني ودنك الله يخليك وح أقولك ..

إحنا بإعتبارنا دول عربية وإسلامية تموت في الإستهلاك .. والإستهلاك في كل حاجه .. لكن الإنتاج .. يا حسرة كل عقبه وعقبة أكبر من خليج العقبة ..

ولأننا دول تحب الإستهلاك من أول التسالي إلى السيارات فمن المؤكد أننا عالم نحب نصرف .. إصرف ما في الجيب
الفقر مش عيب .. طيب بكده .. إحنا شكلنا بلغة الإقتصاديين
قوة شرائية كبيرة .. طيب إحنا برضه عندنا ضرائب ..
والرسوم دي كلها بتخدم الإقتصاد القومي .. وإحنا كمان بنفكر نتجـه إلى الصناعة والزراعة .. عشان نقدر نعمل منتج بسعر معقول ويتناسب مع دخول الأفراد .. حلو الكلام الجميل ده ..؟ أصبح عندنا جـوه بلادنا منتجات تخدم البلد ..

آه ولاد الأبالسه الغرب ما عجبهمش الكلام ده .. يعملوا
إيه ..؟  هما عاوزين يكونوا دايماً أسياد وإحنا عبيد .. وطبعاً الجماعة ولاد الإيه بتوع الصين وشرق آسيا وتايوان وووو .. إلخ عجب العجب .. الحاجة إللي تكلف عشرة .. عملوها بواحد .. وغرق السوق يا جدع بكل حاجه حتى فوانيس رمضان .. فكروا اخوانا الأبالسة الغرب .. نعمـل إيـه ..؟ نفكر في إيه .. قالوا جات ولقيناها .. قلنالهم جات إيه ..؟ قالوا الجات .. والجات ده ياسيدي بإختصار شديد .. توحيد أسعار منتجات العالم ..

مش إحنا دايماً نقول العالم بقى قرية صغيرة .. وهب دخلوا علينا بالحنجل والمنجل .. وإلا ح تنفذوا الجات .. وقعدنا إحنا العرب نفلفص .. حلوه نفلفص دي ..؟ يعني نزوغ .. نتهرب .. هما مين .. وهب قالك ح يكون فيه تاريخ معين بعد منه ح نوحد الأسعار .. ولازم جميـع الدول تنضم لعضوية هذا الجات وتلتزم .. يا خراب بيتك ياكرياكو ..

عشان كده بنقول يا عرب يامسلمين إتحدوا .. فإن الخطر قادم .. إعملولكم حاجه مشتركة تقدروا تقاوموا الجات .. أحسن لو جات سحابة طوفـان .. مش ح تخللي حد .. ع العموم أنا قلت سواء جات أو ما جاتش .. أعملكم إيه .. مع عم جات .. جات جات وف ديله سبع بهوات  …