ع المــــــــاشي ....

ع المـــاشي هـــذا إصطـــلاح لمــحل سندوتشات بيسموه بالإنجليزي تــاك أواي يعني بالعربي أطعمه سريعه تاخدها تاكلها وإنت ماشي .. عشان كده سموها ع الماشي ...

وع الماشي ح آخدها وإستغلها وأقولك وحياة أبوك بلاش تعمل لي فتك وحرك وتترجم كلامي غلط .. الواد الطيب بيكتب الكلام ده ويسلسله علشان تقراه يمكن تستفيد شئ ولو تسالي ما هي برضه التسالي فايده ...

الواد الطيب لما بيكتب مش بيكتب عن حد .. هو بيتعمد يكتب عن نفسه والحدق يفهم .. طيب وليه ياطيب تكتب عن نفسك إنت مش خايف من كلام الناس .. كلام الناس يابني لا بيجيب ولا يودي .. وعمر الناس ما ح تبطل كلام مهما عملت .. ودي هوايه جميله ف بلدنا بتضيع الوقت .. وروح القهاوي وإنت تعرف كلام الناس ياحبيبي ما بيخلصش .. طيب وعشان أريحك وأريح خاطرك وماتبقاش انت تعمل زي الناس .. ح أقولك ..

أنا لما أكتب عن نفسي أريح الناس وأرتاح .. مش يمكن واحد أكتب عنه يرفع عليه قضيه .. ما هو فاضي .. والفاضي يعمل قاضي .. وبعدين أنا بأكتب الكلام ده كلام .. مش عشان أدخل ف قواضي .. ده ياحبيبي مدخل ماتعرفش تخرج منه ..

من بعد هذا العمر الطويل اللي عشته ف مرمطه وبهدله .. طلعت بنتيجه سهله قوي و ح اقولها لك عشان تريح نفسك .. أى مشكله عاوز ماتحلهاش إرفع قضيه .. وشوف .. ياحبيي .. تـتـأجل وتـتأجل وتـتأجل وتخلص السنـــة القضائيـــه في يونيه وهُــب تبدأ في أكتوبر وتـتـأجل وتـتأجل وتـتأجل وهكذا ..

يعني أنصحك إذا كان عندك حفيد علمه ودخله كلية الحقوق علشان يكمل المشوار مجانـــا ...

 الصفحة السابقه - الفهرس - الصفحة القادمة