غـــــربــــه ( 6 )

مشــاريع الطماعين والهباشين

ياسلام .. مجرد ما يعرف أخونا زعيم الأونطه إنك شغال في الغربة .. يطلع بمشاريع تكسب الملايين فى خلال ساعات وثواني ويفرشلك الأرض رمــل .. ويدهن الهــــوا دوكو .. والدوكو هــوا .. ويضرب الأرض تِطلــــع بطيـــخ أحمـــر .. لـــون عنـيـنـا من كُــتر العِيــــاط ع اللي راح ..

يقولك شوف .. المشروع ده أنا أخاف أتكلم عنه مع حد .. ولكن لأني بأثق فيك ح اديهولك إنت .. لأنك أخويا وباشوف فيك الإخلاص .. وخللي بالك .. أنا ما احبش حاجه من غير كتابه .. نكتب إتفاقيـات ع الورق .. أيوه كله ع الورق .. دي حياه أو موت .. والواحد مش ضامن عمره .. وأنا مش عاوز عيالي يطلعوا عليك ياكلوك لو حصل حاجه ..

إنت بـس تحط كده قرشين عربون.. طبعا القرشين دول .. إنتو سيد العارفين .. ويرجع يقولك بس خللي بالك إحنا شركاء .. ع الحلوه والمُــــره ..

ويامولانا ..  فجأه تلاقي الملايين بقت ملاليم ..

والتِـــبر ياحســــره بقى تِــــبن ..

وإتفاقيات الورق بقت فعلا ورق تواليت ..

والعمر مايضيعش ويطول عمره ..

والعيال ما يلاقوش حاجه ياكلوها .. أو ما ياكلوش ..

وبدل ما يرجع العربون .. يصبح الغريب مديون ..

وتصبح الحياه ع المُره والمُره متعاهدين ..

ويرجع غريب يامولاى كما خلقتني ..

بالذمه مش حــــرام ..

واللــه حـــــرام ..

 الصفحة السابقه - الفهرس - الصفحة القادمة