غــربــــه أربعــــه ( 4 )

                   تحت هذا العنــــوان الواد الطيب قرر يبقى أديب ويكتب قصص .. أهى .. محاولات .. تعالى نقــــرا معـــاً هذه القصة القصيرة .. بعنوان ..

{ إتـِّــق شر مَنْ أحسنـْــتَ إِليـِّــــه ... }

 أرجو ان نستعد .. لربط الأحزمة .. ستبدأ القصة ..

جوعان وشبعان صديقان تربوا معا أصدقاء الحارة والمدرسة في جميع مراحلها حتى الجامعة .. وخرجا للحياه .. كل واحد شق طريقه ..

شبعان موظف محتـــرم ..

جوعان رجل أعمال وصاحب مصانع لا يعرف شبعان من أين حصل جوعان على تمويل هذه الأعمال ولكن لأن شبعان بعيدا عن جوعان إتهيأله إنه جمعها من الحلال .. 

ومرت السنين والأيام وجوعان وشبعان لا يجمعهما إلا لقاء سريع قد يكون كل عام وقد يكون كل ثلاث أعوام ..  

جوعان بيكبر وشبعان بيكبر وكل واحد في طريقه عايش .. ده إتجوز وجاب عيال .. وده إتجوز وجاب عيال .. وكل واحد مفيش مابينهم إلا سلام عليكم .. وعليكم السلام ..

وبعد غياب .. يلتقي جوعان صدفه عند الشياطين .. أيوه والله عند الشياطين .. أصل شبعان وجوعان كانوا بيحجوا .. وفجأه شبعان لقى جوعــان خارج من عند الشياطين ومخنوق .. وفجـــأه مين شبعان .. مين جوعان .. وبالأحضان ..

وإتلم الشامي ع المغربي .. وإتواعدوا .. وبقوا يتقابلوا سنويا ثلاث أربع مرات .. فين .. فى البلد اللي مستقر فيها شبعان .. وكان شبعان بيكرم جوعان كرم ما بعده كرم إبتغاء وجه الله وصداقه وزمالة عمر .. ما هو ده برضه حق عليه ..

والدنيـــا ماشيه .. والأمــور ماشيه .. وجوعان هو دايما بيجي لشبعان .. وشبعـــان بحُـكم الغربـــة بيكـــرم جوعان آخر كرم والحمد لله .....

وتـدور الأيام .. ويظهر طمعان .. طمعان ده يبقى مين ..؟ صديق شبعان وجوعان .. حلو ..؟ حلو .. طمعان بتدهور بيه الحال .. ويلجأ الى صديقه شبعان .. اللي برضه بيكرمه آخر كرم ويشغله ويهيصه فلوس وأكل ولعب وحب .. والحياه ماشيه ..

وفي يوم من ذات الأيام .. يظهر عدمان .. عدمان ده مين تاني .. ؟ ده بقى من طرف قرابه لشبعان .. وشبعان ده راجل على نِيّـــاتُه برضه أكرم عدمان آخر كرم ..

وأيام تروح وأيام تيجي .. وعدمان رايح جاى ياخذ فلوس من شبعان .. وطمعان قاعد بيأكل فى قَتـّــــه محلوله من تعب وجهد وخير شبعان .. والدنيا ماشيه ..

والدنيا ربيع والجو بديع وسلملي على كل المواضيع .. مع الإعتذار لصلاح جاهين الله يرحمه ويفشفش الطوبة اللي تحت راسه .. معرفش .. أمهاتنا كانوا بيقولوا كده ..   

المهم .. قاعد شبعان مع طمعان قعدة فرفشه وإذا بطمعان يبلغ زميله شبعان بأن ماعرفتش الخبر .. خبر إيه .. ؟ مش الضرائب حجزت على جوعان ومسكين حالته صعبه قوي وبيبيع المصنع والشقة وياغُلــــبي ..      

شبعان راجل شبعان .. وبيحب أصحابه قوي .. للأسف ياخيبته .. بيحبهم أكتر من نفسه ومن أهله ومن ولاده .. شوفوا الهبل .. !!! شبعان ده عمره ما كان دخل بيت جوعان .. كان يكتب له جوابات والعنوان عنده .. صعب عليه صاحبه .. نزل له بلده مخصوص وراح زاره ومن غير مـــا يعرّفـُـه إنه يعــرف حاجـه عن موضوع الإفلاس ده ..

عــرض عليــه يشتغل معاه فى الغربة .. جوعان بيسأل .. ح أشتغل إيـــه .. شبعان يقوله في نفس شغلتك .. جوعــان يقوله شُغلتي الجِــزم .. شبعان قاله عليك نور .. تشتغل فى الجزم ونتشارك نكسب عشرة قروش خُـــد إنت تمانيه وإديني إتنين .. بس تمشي بما يرضي الله ..

جوعـان فكر .. وعينيه برقت ولمعت وقاله سيبني أفكر .. شبعان قاله أنا تحت أمرك .. وإنت عارف عنواني ومستني منك رد .. وخرج شبعان سعيد ومبسوط إن ربنا ح يوفقه ويساعد زميل في أزمه .. ولكنها كانت أزمه جلد .. هــا هــا ها ..

جوعان فكر ودبر وقرر والله أعلم فيما فكر ودبر وقـرر .. ووافق على عرض شبعان بشرط إنه يكون هو الآمر الناهي .. وأن يقوم شبعان بدور الممول .. وهو بدور الصريف والمحرك لجميع الأمور ويرفض بإباء وشمم أى أحد يتدخل في شئونه بإعتباره الخبير والمثمن والقاضي والحَكم .. ووافق شبعان .. حبـــا وثقة منه في صديق العمر .. وياريتها ما تمت ..

وتحرك وبرطع جوعان في أموال شبعان .. وشبعان مسكين .. نعسان لا ورقه .. ولا وصل .. ولا كتابه ولا قلم .. عمي شبعان من ثقته في جوعان ساب له الحبل ع الغارب .. يتصرف كما يشاء ..

وتفـوت سنة .. وراها سنة .. ويسأل شبعان بإستحياء .. أخوه جوعان .. بأدب شديد .. ياجوعان ياخويا .. ماسمعناش حاجه عن الأرباح والمكاسب فى الجِـزم ..

وجوعان بثقة وإقتدار يقوله .. أنا إتبنيتك خَلاّص .. إطمئن ده مكسبنا ما شاء الله .. ولأن جوعان دايما ماسك سبحه فى إيده وبيعمل كل جمعة عُمره ويقرا الوِرْد ومرَبّي حتـــة دقن صغيره .. كانوا بيسموها زمان ( سكسوكه ) سمعناها كده .. وطبعا من محاسيب حلقات الذِكر .. وأخونا شبعان مطمئن .. ساكت .. وإنتظر .. جاب فلوس من الناس ومن كل مكان وإداها لجوعان ..

 وبعـدين .. جلس جوعان مع شبعان وقعد يشتكيله من السوق ولأن المكسب بسيط علشان إحنا لسه بنأسس .. شبعان ربك والحق الفار لعب في عِـبّــه .. أصلها فلوس ناس .. لو فلوسه ماتهمش ..

مكسـوف ياكبدي يكلم صاحبه جوعان .. ح يقوله إيه ..!!  إنت راجل حرامي ..؟ مش معقول .. قول إيه .. قال ياواد شد الرحال على صاحبك طمعان وخُـــد رأيه ..

وراح لطمعــــان فى آخر البلاد وإشتكاله همه .. قاله طمعان الحقيقه  .. جوعان ده يا أخويا حوت .. وخللي بالك منه .. إزاى وإنت صاحبه ..؟ والله أنا بقولك ده حوت ومالوش أمان ..

شبعـان المسكين يضرب كف على كف .. إنت اللي بتقول كده ..؟ طيب .. ورجع شبعان ومش عارف يعمل إيه .. قال ياواد راقب  شويه .. بس ح يراقب إيه .. ما كل الفلوس وكل الحسابات وكل الورق مع جوعان ..

وفاتت سنة تانيه .. وأخونا جوعان بدأ يختفي .. وكل ما يحاول شبعان يقعد معاه يتهرب .. ويـتـزحـلق .. وما تعرفش تمسكه زي التعبان .. وزنقــه شبعان وقاله قوللي أرجوك فلوس الناس .. وجوعان التِعبـــان الحوت .. قام يتمسكن .. بأقولك إيه .. حــرب الخليج .. مالها ..؟ خدت كل حاجه .. إزاى ..؟ الموقف خسران جدا .. وراحت نـص الفلوس .. إزاى ياجوعان ..؟ إزاى ياخويا ياصاحبي .. وإنفجر التعبان الأقرع وقال .. هيه كده .. سيبوني أفكر وأعدل الوضع وإدوني كمـان سنه .. طيب .. هو بإيدنا حاجه .. بس فلوس الناس ياجوعان .. أنا الضامن .. أنا غلبان .. وأصبح ياعيني شبعان هـــوه الغلبان ..

وإختفى جوعان وأخد كل حاجه معاه وهرب بفلوس الناس وساب شبعان لايص .. وهو هايص .. وهجموا عليه الدّيانه .. ماهم مايعرفوش إلا شبعان .. وشبعان ياعيني شهور يكتب لأخوه .. وصديقه .. اللي كان صديقه .. إلحقــني .. الناس .. الدّيانه .. إنت أخدت الفلوس ومشيت .. وهربت .. حرام عليك .. ويزُق عليـه الناس ويقولهم كلموه .. قولولوا .. قولولوا .. زي عبد الحليم حافظ الله يرحمه .. والناس مهما يقولولوا  .. ظهر .. جوعان الحوت التعبان .. وأعلن صيحـتـــه الشهيرة .. بعد أن مرمط شبعـان في الأرض .. ويقول .. أعلى ما في خيلك إركبه .. ويجري شبعـــان على طمعـــان وعدمان ولا مجيــــب ..

وياحسره .. ركب شبعان الخيل .. وقعد يلملم من هنا وهناك .. وباع .. وإستلف .. والناس كلها وقفت جنبه .. وسدد ديون سرقها جوعــان وهرب .. والمصيبه اللي وقف جنب جوعان مين .. ؟ عدمان .. وطمعان .. الطامة الكبرى .. وشهدوا معـــاه ..

ويتلموا الحبايب والأصدقاء .. ويحاولوا يتكلموا مع طمعــان .. وطمعان يحُــط شروطه .. خلوا شبعان يجي يِقَّبِل الأيادي وأعطيله الحق بالكامل .. طب ليه .. ؟ يعوض عليه ربنا شبعان .. ويستسلم شبعان لقضاء الله وقدره ويعتبر ان هذا درس قاسي لم يتعلمه مجانا .. ويلملم نفسه .. ويقفل بابه عليه .. وينسى التجاره ويعيش حياته .. ويقول منُــه للــه .. وحسبي الله ونِعـــم الوكيل ..

ولكن .. جوعان مايسكتش .. إزاى شبعان يفضل هـادي .. ويفتح جوعان نيران جهنم على شبعـــان .. عاوز يحرقه .. عاوز يقتله .. عاوز يموته .. ويفتح النيران فى جميع الجبهات .. والشر دايما عمره طويـــل ..

ويتـــلقى شبعــــان ضربات ظــــالمه متتاليه وكان يصد فقط هذه الضربات .. مؤمنا بأنه إذا دعتـك قدرتك على ظلم الناس فتذكر قدرة الله عليك .. والحدوته لم تنتهي .. والمحاكم اللي عمره مادخلها شبعان .. بدأ يدخلها .. والمحامين كتروا .. ولأن المدعو جوعان أستاذ فى فن الشر والدهاء والسرقة .. وإحتراف الإفلاس مازال يـتـحَجِّج ويصرخ ويشتكي ..

ياتــــرى .. هل جزاء الإحسان إلا الإحسان ..؟

والــــلا .. إتـــق شـــر من أحسنت إليـــه ..؟

أقولكم إيه .. المسامح كريم .. وحسبي الله ونِعــم الوكيل وتوته توته لم تنتهي الحدوته ..

                   لأن كل ما إنتهينا تنفتح تاني ..

                                                          معــــلش ...

الخاتمـة      سامحوني .. لكن أهى عِظــه وعِـــبرة .. إقفل بابك عليك .. لا تعطي أحد شئ إلا بإيصال مكتوب .. ويزعل يضرب دماغه فى الحيط .. وأحسن لك ما تساعدش حد .. مفيش حد يستاهل ..

 الصفحة السابقه - الفهرس - الصفحة القادمة