نرجــــع تــاني ... للغربـــــه ...

غــربــــه تلاتــــه ( 3 )

                   الأهـل عشمانه والعشم غـــالي والعين بصيره والإيد قصيره .. وماحدش مصدق إنك خالي الإيدين .. ياحول الله .. معقوله قاعد فى بلاد الغربة وماعملش الملايين .. ياحول الله .. طب مايرجع .. ونعيش في بلدنا أحسن .. وأكتر إحترام .. ياريـــت ..

                   الأهل عاوزه .. وعاوزه .. وهات .. مع إن هات بالإنجليزي يعني قبعه .. الواد الطيب ثقافته إنجليزيه .. عرفها لوحـــده .. هــــات .. هـات .. هـــات ..

وياويلـــك لو قلت لأ ..

بقى شُـــح .. بقى بخيـل .. الفلوس غيرته .. على إيــه ياحسره المنظره دي كلها .. ياستـــار .. ده وشه يقطع الخميره م البيت .. خليـــه .. لما نشوف آخرة التحويــــش ..

أما لو قلــت حاضر ونعــــم ..

أمــــــير ما شاء الله .. جــدع .. اللي في إيده مش له للناس .. ربنا يزيده .. بس لو شد حيله معايا شويه وساعدني وكمل معايا المسيره لحد ما اقف على رجلي وأشتري حتـة الأرض للعيال وأبنيها يبقى كتر خيره .. ما هم عيالي عياله وأنا أصلي ما سافرتش بره .. ما اتغربتش .. ما انا برضه حارسله ولاده .. أقل حاجه إنه يهتم بيه شويه .. هو صحيح مش مخليني عاوز حاجه .. إنما برضه هوه لو شد حيله شويه أخلّص العيال وأرتاح .. وساعتها ح أدعيلــه ..

                   إيه رأيكم .. مش عارف أقول إيه .. ماتقولش ولا تعيدش كله ماشي .. وكله عند العرب صابون .. والله ما انا فاهم يعني إيه المثل ده لكن كنت دايما زمان أسمعه ..

الله يرحـــم أهالينـــا .. ألف رحمه تنزل عليهم ..

 الصفحة السابقه - الفهرس - الصفحة القادمة