حــب للبيـــــــع  ..

                   أيــوه والله .. ماتستغربوش .. حب للبيع .. أنا باكتب الكلام ده من الغربه .. عشرين سنه .. عمــر .. مش شويه .. طيب ياواد ياطيب .. فيه حب للبيـــــع ؟ !!

أمـــــال .. أقولــك  ..

الواد الطيب متهيألى ماعدش منه الأيام دي .. معطـاء .. يحب الناس .. حاكم فيه ناس ياصاحبي ربنا خلقهم لقضاء حوائج الناس .. وفيه ناس ياصاحبي ماتعرفش تقول لأ .. وفيه ناس ياصاحبي لما تطلبها مايكونش معاها تنكسف قوي .. وتبقى مش عارفه تعمل إيه .. تــروح تستلف وتديلك .. فيه ناس ياصاحبي ربنا خلقهم بكسوفهم .. مهما كبروا بينكسفوا .. فيــــه ناس ياصاحبي ربنا وضعهم في كل عيله .. واحد بس .. أو واحده بس .. في كــل أسره .. ربنا سبحانه وتعالى يزرع فيهم الحنان والمودة ويبقوا هما المسئولين عن رباط هذه العيله ...

فيه ناس ياصاحبي طيبه وتحب الناس .. ولما واحد يعمل فيها معروف مهما كان صغير تفتكره وعمرها ماتنسى هذا المعروف وتفضل طول حياتها تدي وتحاول ترد هذا المعروف ومهما أعطت تحس إنها ماردتش حاجه ...

فيه ناس ياصاحبي نادره جدا .. موجود منها بس بسيطه قوي .. تقسم رغيف العيش بينها وبين ناسها .. فيه ناس ياصاحبي تدي الرغيـف كله لواحـد محتاجـه ومش مهم هيه تاكل .. وتصوم لتـاني يـوم ..

فيه ناس ياصاحبي تتفانى في خدمة الناس وتفرح قوي لما تلاقي الناس بتضحك وحلوه وبتحب بعضها ...

الواد الطيب واحد منهم .. لو تقرا ياصاحبي مره تانيه من أول ما قلت لك حب للبيع .. ح تلاقي الواد الطيب دفع فلوس كتير وإشترى بيهــا هذا الحب .. وللأسف الناس مش فاهمه .. ولا مقدره .. معلش يا طيب .. إعمل الخير وإرميه البحر ..

 الصفحة السابقه - الفهرس - الصفحة القادمة