النــــاس في غربتـــــك ...

الناس في غربتك لا رحمه ولا شفقه وكأنك ياعيوني في بيتك خرطوم بيصب فلـــوس ...

رايح .. جاى .. شايل للناس ولا عاجب الناس ..

مفيش جواب م الناس يسلم عليك .. إلا كل جواب فيه حاجه .. وحياة أبوك الواد إبني عاوز ترينينج سوت ماركة سيكي ميكي .. أقولك جيب لونين أهوه ينفعوا .. بس بقولك إيه ليه شرط إنك تحاسبـــني .. وماله ياخويا ..

إبقى حاسبـــني ...

وإنت جاى جيب معاك الكمبريسور .. مكيف العربية .. أصلي قلبت الدنيا عليه .. مش لاقيه .. هاته معاك وإنت جاى .. وأنا ح أقابلك في المطار .. علشان أدفع الجمارك .. وينسى يقابل الواد الطيب .. والمسكين يتركن في المطار على مايخلص .. ويوصل الحاجه للبيت .. وتسمع الرد الجميل .. تعبت نفسك قوي .. طيب تقوللى بقى الحساب كـــــام .. وقبل الواد الطيب ما ينطق .. يقول ما هو الحق الحق .. بس طبعا أنا لسه إمبارح مشترى حتة أرض للعيال .. أنا ح أسدد لك على راحتي معلش إستحملــني ...

إبقى حاسبـــني ...

معلش بقى إتحملنا طلباتنا كترت .. لكن إنت عارف الظروف في بلدنا .. وبصراحة بصراحه .. إنت ماشاء الله ذوقك حلو قوي .. وإختارلي بقى على ذوقك .. بس الله يخليـــك إوعى تتخم .. دور ع الماركة الكويسة .. أما حسابك ما بين الخيرين حساب .. إنت إكتب لي رقم الحساب وعنوان البنك وأنا ح اقسطهم عليه وأورد أول بأول .. على طول ...

وإبقى حاسبـــني ...

وعاوزين نعمل عُمـــره .. هو حرام نستلف ونعمل عُمره .. والواد الطيب طيب .. يقول حرام .. يقوم حبيبه يقوله بس الوالد والوالدة كبروا وعـــاوزهم يعملوا عمره قبل ما يموتوا .. ربنا يديهم طول العمر ..

أقولك .. إنت تدفعلي حق التذاكر وحاجه كده ع الحساب وأهو تكسب الثواب معايا .. بس إنت عارف لازم تحاسبني ...

وإبقى حاسبـــني ...

رايـــح ...    شايـــــل للنـــاس أمانات ومجاملات والكل ناسي إن ده  بفلـــوس ..

جــــاى ... شايل للناس هدايـــا وحاجــــات ومحتــاجــــات والكـــــل ناسي إن ده بفلـــوس ..

ياناس ياظلمه .. الرحمه حلوه .. هو القرش بيجي بالسهل لما يروح بالسهل .

الناس الظلمه .. تضحك .. وتضحـــك .. وتضحـــك ...

مـــاهم عندهم حق يضحكوا .. أصلك مفتري .. وغريب الشكل .. الناس غلابه .. وإيه يعني لما تساعدهم واللا خـــلاص .. القرش جري في إيديك وما كنتش تعبر حد .. هو فيه حد يعبرك .. ثم إحنا أحسن منك والحمد لله .. إنت ح تتمنظرلي بشويـه الهلاهيل اللى إنت جايبهم .. ياحسرة .. جايب إيه .. قال جت الحزينة تفرح مالقاتلهاش مطرح ..                    

وتسمع وتسمع .. ولو تتكلم تاكل لما تشبع ..

وإبقى حاسبـــني ...

 الصفحة السابقه - الفهرس - الصفحة القادمة