الـــدوامــــــــه ...

والواد طيب زي كل الناس الطبيبين .. واخداه الدوامة .. دوامة الحياة اللي ماترحمش .. بيحاول إنه يعيش بما يرضي الله والناس مش سايباه .. لكن ساكت .. لا بيعلق .. لكن أهوه عايش .. يضحك هنــا .. ويتخانق هنا .. ويزعق لده .. ويحايل ده .. عشان الحياة تمشي .. لكن السن بيكبر .. رغم نجاحه في كل خطوة بخطيها ولكن مشتت ياكبدي .. أفكاره غير محدده ..            

مزنوق مابين إهتماماته وإحتياجاته وإلتزاماته .. وصاحب كلمه وصاحب وعد .. ولازم يوفي ..

طيب .. يعمل إيه .. قاعد سارح .. وح تفضل كده ياواد ياطيب .. بتدور في طاحونة .. تديها القمح تديك تراب .. طب إزاى ..

والواد الطيب .. سارح في ملكوت الله .. ومسلم أمره الى الله .. حاكم الواد الطيب شقي آه ... لكن صاحب مبدأ وشهم وجدع .. وما يخافش إلا من اللى خالقه .. بس عاوز يرسى على بر .. ويهدى شويه .. ومايجريش يسابق الزمن والزمن أسرع منه ..            

وفجأه .. حاجه كده .. روحانيه . من عند الله .. ونِعم بالله .. سرح بخياله بعيـــد ..

يروح بلاد الله .. لخلق الله .. يروح بعيـــد ..

وأبوه الله يرحمه كان يقول سافر .. ففي الأسفار سبع فوائد ..   

ودخل فيها .. ولازم يحكيها .. للأجيال اللى بعده أو اللى قبله .. أهو اللى بعده يمكن يتعلموا ..

والـــــلى قبله يمكن يتألمــوا  ..

وياغربـــه دوبيـــني ...

 الصفحة السابقه - الفهرس - الصفحة القادمة